حبيبى انت جيت ؟ ده كان صوتى بعد ماسمعت باب الشقه بيتقفل قمت وكلى لهفه على زوجى الحبيب اقابله بعد يوم عمل شاق اخده فى حضنى فى محاوله منى انى انسيه يوم من العمل الشاق اتعلقت فى دراعه وانا بوصله لاقرب فوتيه عشان يرتاح وقعدت على رجل الفوتيه وانا بمرر صوابعى بين خصلات شعره يمكن مع نهايه كل لمسه اشيل شويه من الافكار اللى راجع بيها من شغله وممكن تاخده منى ولو ثوانى ده عهد اخته على نفسى انى يوم ما اتجوز مش هسمح لاى حد ولا لاى شى انه ياخد حبيبى منى حتى ولو كانت مجرد افكار او هموم عمل بعد دخوله من باب البيت بقى كل وقته من حقى انا وبس وطول الكام شهر اللى فاتوا من ساعه ما اتجوزنا وانا ما اخلفتش العهد ده ابدا .
بدات بفك زراير القميص (مش عاوزه حد تفكيره يروح لبعيد) مش تقوم يا حبيبى تاخد شاور انا محضرالك كل حاجه فى الحمام وقام سبعى بتكاثل وانا وراه بزقه زق عشان يكمل خطواته لحد الحمام بعد ما نجحت فى مهمتى مشيت بتانى الى المطبخ عشان اجهز الغدا على السفره وانا واقفه لوحدى بدات افكر ازاى هقوله طب هقوله ايه طب يعنى اقول كده مره واحده ولا امهدله الاول تؤ لازم امهدله الاول الخبر ممكن يخليه يتجنن طب قبل الاكل ولا بعده طب اقوله وهوه بيشرب الشاى ولا الخبر عاوزله كوبايه عصير مانجه مشبره اممممممم طيب هتعرفوا حالا اهو يا ساتر الخبر هوه انـــــ حبيبتى محتاجه مساعده ولا خلصتى ......؟ اعمل ايه فقريين استنوا بقى اما تعرفوا معاه
لا كله تحت السيطره وكله تمام( اصلى كنت لسه متفرجه على تقرير مجلس الشعب هئ هئ )قعدنا على السفره وكالعاده لازم اول لقمه يمسكها تكون من نصيبى( بس ايه الريحه دى اف) حبيبى هوه ايه الريحه اللى انا شماها دى ريحه ايه مش عارفه هوه انت حاطط ايه ده البرفان اللى انتى بتحبيه اه طيب وغصب عنى تقوس حاجبى بشكل مرعب ولا افريد شوقى فى زمانه وبينى وبين نفسى قولت اكيد انا عارفه ايه السببفى انى مستغربه الريحه بالشكل ده المهم عدت فتره الغدا وانا لسه فى حيرتى اقوله بقى ولا استنى شويه ؟
واقفه بعمل الشاى وسايباه جوه بيعمل تليفون والاقى ايد على كتفى بتدورنى بشويش واحن عيون فى الدنيا بصالى وبمنتهى الحب سالنى مالك يا قلبى وبمنتهى الخبث رديت مالى مانا زى الفل اهو قالى لا من ساعه ما رجعت وانا شايف فى عنيكى نظره مختلفه وحاسس انك عاوزه تقولى حاجه خير ؟يا حلاوه يا ولاد ده حاسس بيا سكت شويه وانا بفكر فى الكلمات اللى ابتدى بيها الكلام ودخلت على تخيل رد فعله وانه هيعمل اييه لما اتكلم وا....(......)مالك فى ايه؟فوقنى وهوه بيهز كتفى وبينده باسمى وبدون اى مقدمات(......)انا حامل واتجمد الموقف وكاننا فى فيلم صامت من بتوع زمان دول اللى عمرى ما شفت واحد منهم بس عنينا هى اللى بتتكلم ياااااااااااااه قالى كلام حلو قوى قريته كله فى عنيه كل ده ايده لسه على كتفى وتقريبا انا كنت بدات اتعود على الوضع ده لولا انى فى لحظه لاقيتنى جوه حضنه دايما كنت بقول انى بحس بحبه وحنانه بس دى اول مره احس انى مالكه الدنيا بحالها اول مره احسن انه حاضنى بس انا اللى مالكاه بكل مشاعره وقلبه واحساسه ياااه شعور حلو قوى خليط كده من القوه والضعف الاخد والعطاء الاستسلام والمقاومه وبصوت عميق كانه طالع من بير غويط قوى قالى بحبك المهم يعنى عشان اللى بعد كده اسرار بيوت ومينفعش نخوض فيها قال يعنى انا كتومه قوى الايام اللى عدت بعد كده كانت كلها متشليش متتعبيش نفسك ارتاحى خالص الحاله النفسيه الغير مستقره دى اللى بتيجى للراجل لما يعرف ان مراته حامل لاول مره وبقول اول مره لان تقربا الرجاله فى العيل التانى بيبقوا نحسوا شويه وخلاص بقوا متعودين على الموضوع او بقوا خبره فى ان الحنيه هتجيب دلع والدلع هيجيب سهوكه والسهوكه لازملها واحده شغاله يدفعلها دم قلبه كل شهر يبقى نجيبها من قصيرها كده واللى يقدر على حاجه يعملها خلينا فى تجربتنا الجميله بدانا طبعا نختار اسم الطفل او الطفله ده اذا حطينا على جنبه حماتى الغاليه اللى نفسها تيجى بنت وتسميها تفيده على اسم ستها وحمايا اللى نفسه فى ولد عشان يسميه زينهم على اســـ لالا مش على اسمه ده تقريبا الاخ زينهم كان بيجيبلهم العيش وكان يعزه اكمنه كن بيستلقطله كام رغيف من غير نشاره ولا تبن ومفقعين وريحتهم تفرح انا برضه اعزه بس مش لدرجه انى اسمى فلذه كبدى على اسمه وبعد الشهر الرابع بانت الرؤيا انى حامل فى بنوته واكيد طبعا هتطلع فلقه قمر احم احم هيكون لمين يعنى ليا طبعا وده خلانا نخلص من اصرار عمى على اسم زينهم ولكن حماتى هعمل فيها ايه احجر يعنى واعمل مشكله مش ينفع خلاص يا بت اصبرى والعمل عمل ربنا والمثل بيقول اصبر على جارك الـــ هههههه الحلو طبعا مع الاعتذار لتراثنا الشعبى وامثاله العريقه وفى يوم كده وانا قاعده فى البلكونه ببطنى اللى بدات تبان معالم الست هانم عليها وبفكر فى اسم لجنابها اخدنى التفكير لابعد من الاسم والشكل للمستقبل للتربيه للمبادئ اللى هعلمهالها للدين اللى المفروض اشبع عقلها وقلبها بيه لعلاقه الصداقه اللى بتمنى انها تكون بينا وبدا تفكيرى ياخدنى لبعيد لبعيد لبعييييييييييييييييييييييييييييييييييييييييييييييييييييييد
المشاركات
