لولولولولولولولولوى الف حمدا لله على سلامتك يا حبيبتى اللى جاباك يخليلك بنت زى القمر
بجد والله
والنبى يا حبيبتى فلقه قمر دى عرسانها هيبقوا زى النمل
دى كانت واحده من جارات الست الوالده جت تباركلها لما شرفت اصل انا وبلافخر اخر العنقود يعنى اساسى ومش مستغرب لما تلاقونى شربات ومسكره طبعا بما انى اروبه من يومى وهوايتى المفضله تلميع الاكر رميت ودنى فى حجرهم وهما بيتكلموا واكتشفت كده بالحداقه المعهوده فيا من يومى انى تقريبا كنت مولوده حلوه طبعا ما ابويا هوه اللى شاددنى للدنيا صحيح حز فى نفسيتى قوى انه يستقبلنى بقلم على ........مش ضرورى افسر بس المثل بيقول ضرب الحبيب زى اكل الفزدق(الزبيب بقى بلدى قوى)وانا من لحظه ما اتولدت وفى غرام كده بينى وبين السيد الوالد غرام غير مبرر لكن مع شويه مفهوميه من بتوعى قدرت استنتج انه سعيد بيا لانى الاثبات الوحيد بانه لسه شباب وفى عزه بيقولوا على الاطفال اللى زيى كده جت على غفله متفهموش ايه المقصود بالغفله فى مناسبه سعيده زييى
من يوم ولادتى وانا حاسه انى اميره مدلله يعنى هحكى عن بعض المواقف اللى كنت بختبر فيها تاثيرى القوى فى البيت مثلا ابقى واكله ومغيره البامبرز( اييييييييييييييه محدش احسن من حد الكل مر بمرحله البامبرز )والحال عال العال وتلاقينى اقعد ازن وارخم الاقى اللى يجرى يهشكنى والى يدلق على وشه وهوه بيجيبلى الشخشيخه اياكش انسد وانام وكانت لعبتى المفضله انى اخد اللعبه وارميها فى وش اللى قدامى (لا لا عارفه اتكيت من يومى )واتلذذ اما الاقيه يتكفى ويجيبهالى تانى وافضل امارس هوايتى المفضله لحد ما يبتدى الزبون الصبور يزهق ويعلن انه مش هيشتغل لحساب الشبر ونص وساعتها بقى يا سلام هى دى اللحظه اللى بستناها عشان اقوم بادائى فى مقطوعه سوبرانو من اللى قلبكم يحبها (هئ هئ مش عارفه ليه الاذيه دى)ولما شديت حيلى كده دخلونى الحضانه كان اسود يوم فى حياتى على حد تذكرى كانت حضانه بعدنا بشارعين بتاعه ابله فتاكات كانت عباره عن شقه فى دور ارضى محاطه بحديقه مش عاوزه افتكر ملامحها وكان زملائى المساجين اااقصد الاطفال الابرياء من كل شكل ولون يعنى مثلا افتكر الطفله الجميله اسراءكانت دايما لابسه ظعبوط صيف وشتاء بدون مبرر لدرجه انى افتكرت انه جزى من تكوين دماغها وكانت على طول ماسكه مصاصه من ام شلن وواضح ان كرم اخلاقها كان بيحتم عليها تعزم الدبان يوميه على وجبه المصاصه وتقريبا كان بدا ينشا علاقه ود بينهم لانه كان بدا مايفارقش عنيها وثنايا بقها الصغير وكانت اسراء ليها هوايه تانيه الا وهى اكل اوراق الشجر والله العظيم انا فى يوم مديت ايدى على ورقه شجر وبدات اتذوقها يمكن الاقى فيها ميزه او شئ جميل لكن فشلت فى انى امارس الهوايه دى ومن بعدها بدات اصنف اسراء على انها بنت (لو ستاندر)ومش المفروض بنت من الطبقه الراقيه زيى تعرفها
اما بالننسبه لهريدى فده كان طفل زى القمر عنيه ملونه وشعره اصفر ووشه مقلبظ وجميل بس معرفش ليه كان دايما عنيه محمره من العياط والمريله الكاروه لم يفارقها ابدا بقعه تتوسط صدره من اثر الترجيع يععععععععععععع ايه القرف اللى انا بقوله ده
بس والله دى الحقيقه
وكان معايا هبه بنت الذوات من نفس الطبقه اللى بنتمى ليها ودى كانت صديقتى المفضله لكونها على طول شعرها متسرح وريحتها حلوه .
بس انا برضه عمرى ما استكنت لفكره انى اترمى فى حضانه بالشكل ده حسيت ان فى ايد شريره بتحاول تسلبنى حقى فى البيت بتاعنا المهم كل يوم وماما بتودينى الحضانه كنت بركز قوى فى الطريق عاوزه احفظ السكه كنت تقريبا فى الوقت ده عندى اربع سنين وفى يوم اختمرت خطه الهروب فى دماغى لازم احرر نفسى من الجو ده مش حاسه انى مبسوطه المهم كان يوم الشمس فيه طالعه والكل ملهى فى ترجيع هريدى فى اوضه من الاوض قمت واخده ديلى فى سنانى ويا فكيك وطلعت اجرى وتقريبا الابله فتاكات لمحتنى بطرف عينها ولاقيتها طالعه تجرى ورايا وانا اجرى وهى تجرى لحد ما وصلت للبيت خبطت بهستيريه على الباب لحد ما انفتح الباب ومن وراه بابا الحبيب ببنطلون البيجامه وفانله حمالات وعنيه لسه مفتحتش من النوم جريت اترميت فى حضنه وانا حسه بالحمايه :بابا الحقنى بيجروا ورايا عاوزين يمسكونى
فيه ايه يا شيمو مالك يا قطتى
مش عاوزه ارجع تانى هناك يا بابا خلينى هنا وانا هعملك تفطر
المشاركات
